الاول خلينى اعرفك تقسيمة الارض بعد حدوث (الطوفان العظيم) كانت عامله ازاي..
---
ربنا كان وعد سيدنا (نوح) بوعد عظيم وهو (وَجَعَلْنَا ذُرِّيَّتَهُ هُمُ الْبَاقِينَ).. يعنى نسل نوح هو اللى هيبقا فى الارض بعد الطوفان..
وفعلا نجأ ذرية نوح عليه السلام وكانوا 3 من الابناء (سام – حام – يافث)..
وبعد ما ابوهم (نوح) ما مات..
كل واحد منهم بدأ ينتشر فى الارض بنسله..
..
وتوجه سام بن نوح : لمنطقة اسمها (الاحقاف)..
وعاش فيها هو وابنه "عوص" ثم مات "سام" واستمر ابنه "عوص" فى نشر الدعوه بعده للعباده.. وخلف ولد سماه "إرم"..
..
اللى كان بدأته التطاول فى البنيان مره تانيه والتكبر والتجبر..
وحكم "إرم" مدينة داخل بلدة الاحقاف (فى اليمن) مكانها بين عمان وحضرموت!
واستمر حكمه لحد ما خلف "عاد"..
واطلق على المدينة بعد موت الملك اسم "إرم"..
=============
■ قوم عاد :
---
فى وصف قوم عاد ذكر على لسان الشيخ عمر عبد الكافي..
ان القزم منهم كان طوله : 60 ذراع (ده القزم ما بالك بالاطول فيهم!!)
ولو جينا نقارن طولهم بطول سيدنا (ادم) هنلاقي انهم كانوا كمان اطول من سيدنا "ادم"!!
(عاد) كان كافر هو وكل قومه..
..
وكان طاغيه هو وكل قومه وكانوا اذا دخلوا بلد دمروها واكلوا كل خيراتها وفسدوها اشد فساد!!
لكنه بدأ يحول بلدته (الاحقاف) : البلدة الرمليه الصحراء الجرداء دي بالتدريج لاكبر واضخم واقوي بلدة فى العالم فيها القصور والمزارع والحدائق..
ربنا عز وجل وضح ده فى قوله : "الَّتِي لَمْ يُخْلَقْ مِثْلُهَا فِي الْبِلَادِ"
اقوي مدينة فى العالم!!
..
وبناء مصانع وبيوت ومتاحف ومعابد.. وكانوا سابقين زمنهم بشده..
لدرجة ان الشيخ عمر عبد الكافي قال :
"انهم وصل بهم الحال انهم بنوا مصانع لتصنيع مواد وادويه تخليهم خالدين ويعيشوا للابد.."
وأيد الكلام ده الامام بن كثير فى كتابة البداية والنهايه وتفسيره للقران..
قال تعال : "وتتخذون مصانع لعلكم تخلدون"!!
..
وبعد استيلاء (عاد) ومن قبله ابوه (إرم) وجيوشهم على الارضي من حولهم .. بدأ ينشر عبادة الاصنام..
وصنع تلات تماثيل للعباده (صمود – صدأ – هباء)..
والناس كانت بتعبدهم تقرب واقتداء باهلهم وغيرهم!!
لحد ما بعث ربنا عليهم عبد صالح من اهلهم اسمه "هود"..
==========================
■ اخوهم (هود) ورد فعلهم تجاه دعوته اهم
---
"وَاذْكُرْ أَخا عادٍ إِذْ أَنْذَرَ قَوْمَهُ بِالْأَحْقافِ"..
شوف تعبير القران الكريم لطيف ازاي (اخوهم هود).. لان سيدنا هود كان رقيق لين مهذب شهدوا له بالصلاح والذكاء وقوة الحجه..
..
دعاهم (هود) لترك عبادة الاصنام ويرجعوا لعبادة الله..
لكن للاسف رد فعلهم كان عنيف معاه..
قالوا له : (انت جاي تعملنا غسيل مخ وتقولنا نبعد عن الالهه بتاعتنا) "أَجِئْتَنَا لِتَأْفِكَنَا عَنْ آلِهَتِنَا فَأْتِنَا بِمَا تَعِدُنَا إِن كُنتَ مِنَ الصَّادِقِينَ "!
رد صادم حتى منتظروش انه يجيب لهم معجزة على صدق دعوته!
قفلوا الباب عليه من اول مره كلمهم فيها..
---
لكن سيدنا (هود) ميئسش واستمر يدعوا لهم فترة من الزمن طويله.. لحد ما اتبعه منهم عدد قليل جدا جدا جدا..
لحد ما هما زهقوا منه وردوا عليه للمره الاخيره :
وقالوا له : "سَوَاءٌ عَلَيْنَا أَوَعَظْتَ أَمْ لَمْ تَكُن مِّنَ الْوَاعِظِينَ"
-مش هندخل دينك.. مهما تعمل!!-
..
ومنهم قالوا : "إِن نَّقُولُ إِلَّا اعْتَرَاكَ بَعْضُ آلِهَتِنَا بِسُوءٍ"
-انت شكلك كده ممسوس او مجنون او ملبوس!!-
..
وقالوا كمان : "إِنَّا لَنَرَاكَ فِي سَفَاهَةٍ وَإِنَّا لَنَظُنُّكَ مِنَ الْكَاذِبِينَ"..
-انت مجنون-
..
ومن شدة كفرهم وعنادهم..
قالوا له : "اللَّهُمَّ إِن كَانَ هَٰذَا هُوَ الْحَقَّ مِنْ عِندِكَ فَأَمْطِرْ عَلَيْنَا حِجَارَةً مِّنَ السَّمَاءِ أَوِ ائْتِنَا بِعَذَابٍ أَلِيمٍ"
قمة الكفر والجحود!!
---
حزن سيدنا "هود" لكنه رد عليهم..
قالهم : "يَا قَوْمِ لَيْسَ بِي سَفَاهَةٌ وَلَٰكِنِّي رَسُولٌ مِّن رَّبِّ الْعَالَمِينَ.."
انا جاي بقولكم اللى ربي بلغني بيه.. ومش عايز فلوس ولا ملك..
..
كان ردهم عليه : "انت جيت لنا عشان نعبد الاهك ونسيب الهة بتاعتنا واجدادنا عشانك انت!!
هات عذابك اللى بتدعيه ده واحنا مستنينك اهو!!
سكت سيدنا (هود) لثواني وجاله علامه من ربنا انهم هيقع عليهم غضب قريب..
رد عليهم وقالهم : "قَدْ وَقَعَ عَلَيْكُم مِّن رَّبِّكُمْ رِجْسٌ وَغَضَبٌ” واكمل من بعدها معاهم " فَانتَظِرُوا إِنِّي مَعَكُم مِّنَ الْمُنتَظِرِينَ"..
وسابهم ومشي هو واللى اتبعوه اللى كان عددهم قليل جدا..
====================
■ بداية العذاب :
---
وتاني يوم بدأ عذاب ربنا عليهم..
توقفت السماء عن المطر والارض عن الزرع لمدة 3 سنين..
3 سنين خربت مدينة "إرم" كل صناعاتهم اللى كانت معتمده على زرعهم وغيره من الخير..
كل تقدمهم فشل.. شغلهم كله وقف..
وبعد انقضاء ال3 سنين من الجوع والعطش الشديد..
---
يجي لسيدنا (هود) الامر من ربنا خد اللى اتبعوك من القوم واطلع بيهم على الكهف اللى خارج المدينه..
وفعلا ياخدهم سيدنا (هود) ويخرج بيهم للكهف..
"وَلَمَّا جَاءَ أَمْرُنَا نَجَّيْنَا هُودًا وَالَّذِينَ آمَنُواْ مَعَهُ بِرَحْمَةٍ مِّنَّا وَنَجَّيْنَاهُم مِّنْ عَذَابٍ غَلِيظٍ. وَتِلْكَ عَادٌ"..
=====================
■ تعال مع بعض نفسر العذاب الغليظ اللى وقع عليهم ده :
يصحي الناس فى اليوم ده على سماء مغيمه..
غيامه سوداء!!
---
تخرج واحده ست اسمها "مَهد" من دارها تروح للصنم بتاعها من شدة العطش عشان تطلب انه ينزل عليهم مطر..
وفى لحظه ترفع رأسها للسماء وتشوف سحابه سوداء بتقرب عليهم..
سحابةُ سوداء شديدة السواد..
فبدأت تصرخ وتصوت من الرعب.. وفجأه اغمي عليها..
..
اتجمع الناس حولها.. وبدأوا يفوقوها..
ويسالوها ايه اللى خوفك ورعبك دي سحابه سوداء مليانه مطر الالهه بتاعتنا هي اللى بعتتها لنا لما طلبناها..
﴿ فَلَمَّا رَأَوْهُ عَارِضاً مُّسْتَقْبِلَ أَوْدِيَتِهِمْ قَالُوا هَذَا عَارِضٌ مُّمْطِرُنَا ﴾..
وبدأوا يرقصوا وفرحوا بيها.. ويرددوا كذب هود كذب هود!!
ونبي الله (هود) خارج البلدة هو من اتبعه من المؤمنين فى الكهف منتظر عقاب ربنا عليهم!!
وسمع كلامهم وهما بيقولوا عليه (كذب هود)
فيرد عليهم فى نفسه "بَلْ هُوَ مَا اسْتَعْجَلْتُم بِهِ ۖ رِيحٌ فِيهَا عَذَابٌ أَلِيمٌ"..
..
واول ما "مهد" ما استفاقت..
قالت لهم "رأيت ريـحًـا فيها النار وأمامها رجالاً عظامًا يقودونها، تلك ليست بسحابةُ عادية"
وهو ده المقصود بـ كلمة (فيها) يعني داخل الريح نفسها فيه الساناه من النار وعذاب اشد من الريح نفسها!!
---
لحظات صمت!!
وفجأه بدون سابق انذار..
الريح تضرب المدينة من كل اتجاه!! الصواعق تضرب عليهم..
يهربوا للبيوت!!
لكن الريح تدخل وراهم البيوت..
الريح تمسك الواحد منهم تطيره فى الهواء..
وتنزل تخبطه بقوة رهيبه فى الارض ينفصل جسمه عن دماغه..
وترجع تاني تمسك فى واحد غيره..
قوة شديده..
الرعب مالى المكان..
8 ايام الريح بتضرب المدينة.. 7 ليالي الريح مسابتهمش!!
..
ونبي الله (هود) بيدعي ربنا ينجيه هو والمؤمنين اللى معاه..
وبعد 7 ايام يخرج النبي "هود" والمؤمنين من الكهف..
ويكتشفوا ان مدينة (إرم) اختفت اتحولت لرمال .. مش باقي منها غير اعمدت المباني..
"فَتِلْكَ بُيُوتُهُمْ خَاوِيَةً بِمَا ظَلَمُوا"..
البيوت بس هي اللى فضلت موجوده الى الان عشان تشهد عليهم انهم تكبروا على ربهم وكفروا..
تدمرت (إرم) وتدمر (قوم عاد)..
بعد ما كانوا بيقولوا (مَنْ أَشَدُّ مِنَّا قُوَّةً)..
ربنا دمرهم وفرتك ملكهم اتحولوا لـ (أعجاز نخل خاوية) باضعف شيء (الهواء).. الهواء اللى لما ربنا أمره انه يدمر..
اتحول لاقوي جندي من جنود الله!!
---
أمر ربنا سيدنا (هود) بالتوجه لمدينة (حضرموت) ليدعوا اهلها.. و وصل لتلك البلاد حول (إرم) خبرهم واللى حصلهم..
وبدأت الناس تتبع سيدنا (هود) خوفا من انهم يحصلهم زي ما حصل لقوم (إرم)..
وبعد زمن طويل..
توفي الله نبيه (هود).. وترك من بعده سلام وايمان وصلاح..
لحد ما جه من بعده قوم ظالمين وهما قوم (ثمود)..
ما أجمل أن نرى العبر في كتاب الله عز وجل
ليست هناك تعليقات: