إزاي تعاقبي ولادك
صح ومن غير ضرب ؟!
تعبتي من ضرب ولادك ومش نافع معاهم ؟
مهما كان عمر طفلك هتلاقي العقاب المناسب لعمره...
الناس اللي عايزه حلول سحريه في التربية كأنها
عصا سحرية .
حضرتك ربيتي ابنك بأسلوب كله ضرب واهانة وبهدلة
هو دا اللي كنا نعرفة فطبيعي سلوكيات ابنك تكون رد فعل لاسلوبك .
عشان تربي ابنك من جديد بأساليب صح ومن غير ضرب
لازم تصبري عشان تشوفي نتائج تغيير أسلوبك .
حضرتك ضربتي ابنك وأهنتيه وبهدلتيه عشان غلط
وعمل حاجات غلط وأنا أم وعارفه يعني إيه أطفال بس أخذت سنين طويلة بأسلوبك دا
فبلاش تستني من أول يوم هتستخدمي أسلوب جديد إنك هتلاقيه ناجح 100% . مره هيجيب نتيجه ومره لا وهكذا لحد مهتنجحي وتستغني عن الضرب
نهااااااائي
تربية الأبناء محتاجه صبر ثم صبر ثم صبررررررر
• العقوبة تناسب الأطفال من 5 سنوات حتي مرحلة المراهقة
1- طفلك من عمر تسع شهور لحد سنه ونص
فاهم كل حاجه وهتلاحظي دا لما تلاقيه بيعمل حاجه
غلط وتنهريه بنبرة حاسمه بمعني تاني تشخطي فيه .
هتلاقيه تاني مره لما هييجي يعمل نفس الغلطه
بيبصلك عشان عارف ومتأكد انك هتشخطي فيه تاني
طفلك في السن دا فاهم الصح والغلط بس لسه مش
مدرك بيضرب ليه فأنسب تصرف وعقاب لأخطاء الرضع النبره الحاسمه وقت الخطأ واهم حاجه انك
تكوني قريبه جدا منه عشان يدرك أن الكلام موجه ليه .
2- لو طفلك سنه ونص لحد سنتين ونص وأخطأ
في اسلوب تاني للعقاب إنك لو قاعده في اوضه تمسكيه
من إيده وتخرجي الطفل بره الاوضه لمدة ثواني لحد ميبدأ بكاء ولما يدخل هتلاقيه بيترمي
في حضنك وعارف انه عمل غلط وعشان كده بيتعاقب ..
والنوع دا من العقاب بينفع وقت العياط من غير
سبب وقت متقوليله اسكت ومش عايز يسكت وقت مابيكون عمال يصرخ من غير سبب .
مع مراعاة إن الطفل مش مريض ويكون وآكل وشارب
ومغير البامبرز وآخد كفايته من النوم يعني مفيش سبب ضروري مخليه يتصرف كده .
وصدقيني دي أهم مرحله في حياة طفلك او عرفتيه
الصح والغلط وكنتي رقيبه علي كل تصرفاته هيعملك ألف حساب في سنينه الجايه وهيريحك ودا
عن تجربه
لا هتلاقي عند ولا صوت عالي ولا صريخ ولا مد إيد ولا أي حاجه تخليكي تحسي إنك فشلتي في تربيتهم .
- ممنوع منعاً باتاً انكم تقولوا تف علي عمو
او اضرب جدو او شد شعر خالتو أو أو أو من هذه التصرفات اللي بتخلي الطفل يتجرأ علي
الكبار وبيعتبر هذه التصرفات حق مكتسب .
3- لو طفلك عمره من تلات سنوات لـ 10 سنين
أ- لوبيعيط وبيزن وعمال يترمي علي الارض عشان
عايز طلب معين . بصي في عينيه
وقوليله كلمه واحده " إنت عارف أنا كنت هجبلك الحاجه بس عشان إنت عيطت وعملت كده
ومطلبتش بأدب مستحيل أجيبهالك "
ومتقوليش أكتر من كده وأوعي ثم أوعي تتراجعي
عن كلامك وتجبيله الحاجه حتي لو تحول لملاك بجناحين ..
مره على مره هتلاقيه بطل التصرف دا نهااااااائي
.
وفي وقت معاقبته تجاهلي عياطه تماماً ولو حاول
يمد إيده إمسكي إيده جامد وقوليله عيب تضرب ماما بنبره شديده وإبعدي عنه .
وبعد مايهدي ويبطل نوبة الغضب هاتيه وبوسيه واطلبي
منه يعتذرلك علي سوء تصرفاته وبوسيه واحضنيه ولازم يعتذرلك . وانتهينا علي كده والحاجه
اللي هوه عايزها تيجي بمزاجك إنتي ..
ب- لو طفلك بيعاندك او بيضايقك او بيضرب اخواته
او وقع حاجه ومش حابب ينضف المكان او شقي جدا ومش مبطل عفرته و متعمد يضايقك بأي شكل
ومش سامع كلامك
- جربي كرسي المشاغبين لما تفقدي السيطره
هو كرسي أو مكان مفيهوش ترفيه ممكن يكون مكان
في غرفة المعيشة
يتم إلزام الطفل بالجلوس فيه لمدة خمس دقائق
لما يعمل اى تصرف يضايقك (احرصي دائما على وجوده في الغرفة نفسها اللي انتي موجودة
فيها ولا ترسليه لغرفة أخرى أبدا ).
وكل ما يقوم قبل ما المده تنتهي ترجعيه ببساطه
لمكانه لحد ميتم المده ولو لقيتيه مش فارق معاه زودي المده بحيث لا يتجاوز الوقت
10-15 دقيقة
أغلب الأطفال بيستجيبوا لوالديهم خلال المده دي
. ولما تخلص المده هاتيه وعرفيه عاقبتيه ليه واطلبي منه يبوسك ويعتذر واحضنيه.
- جربي تخليه لما يغلط يقفز 20 قفزه ولما تخلص
المده هاتيه وعرفيه عاقبتيه ليه واطلبي منه يبوسك ويعتذر واحضنيه .
- هدديه انك هتحرميه من المصروف أو اللاب أو
الهاتف أو الكمبيوتر أو مشاهدة التلفزيون أو الذهاب للنادي أو الخروج يوم الأجازة أو
اللعب مع أصحابه في الوقت المحدد ولو مستجبش نفذي تهديدك ومهما يعمل تجاهلي تصرفاته
ونفذي عقااابك ولو صعبان عليكي افتكري إنك بتعملي لمصلحته وإنك بتعملي كل دا عشان ايدك
متتمدش عليه ويفضل الاحترام قائم مابينكم وإن الضرب إهانه للطفل ولكرامته وليس تربية
نهااااااائي .
- نظام العقاب الذكي بتختاري تلت عقوبات او بتخلي
طفلك يختار تلت عقوبات تشوفيهم مناسبين للغلطه زي حرمان من الصروف او الحرمان من الفسحه
او الحرمان من الموبايل و التاب او اى تلت عقوبات تشوفيهم انتي يناسبوا غلطته وتقوليله
اختار عقوبه من التلاته عشان تنفذها على نفسك ولازم تكون تنفيذ العقوبه بجديه . ودا
هيخلي الطفل يفكر مليون مره قبل الغلط . والصراع هيكون بينه وبين نفسه مش بينه وبينك
.
ليست هناك تعليقات: